ປ່າສະຫງວນແຫ່ງຊາດພູເຂົາຄວາຍ
ບົດຄວາມນີ້ອາດຕ້ອງປັບປຸງໃຫ້ມີມຸມມອງທີ່ເປັນກາງ ເນື່ອງຈາກນຳສະເໜີມຸມມອງພຽງດ້ານດຽວ. ເບິ່ງໜ້າສົນທະນາປະກອບ ກະລຸນາຢ່ານຳປ້າຍອອກຈົນກວ່າຈະມີຂໍ້ສະຫຼຸບ. |
ພູເຂົາຄວາຍ ຫລື ບັບຝາໂລເມົາເທີນ (ອັງກິດ: Buffalo Mountain) ເປັນອຸທິຍານເຂດປ່າສະຫງວນແຫ່ງຊາດ ທີ່ເປັນຫນ້າສົນໃຈ ແລະ ເປັນຄວາມພາກພູມໃຈອີກແຫ່ງຫນຶ່ງຂອງປະເທດລາວ ເຮົາ, ພູຜາ, ແມ່ນ້ຳ ແລ ປ່າໄມ້ ອັນບໍລິສຸດແສນງາມແຫ່ງນີ້ ຢູ່ບໍ່ໄກຈາກນະຄອນຫລວງພໍປານໃດ ຈິ່ງເຫັນວ່າ ເຫມາະສຳລັບຊາວນະຄອນຫລວງວຽງຈັນທຸກທ່ານທີ່ຕ້ອງການຈະຫລີກຫນີ ຈາກຝຸ່ນຄວັນຂອງເຄື່ອງຈັກໄປສຳຜັດກັບບັນຍາກາດອັນແສນສົດຊື່ນລື່ນລົມ ໂດຍໃຊ້ເວລາພຽງບໍ່ເທົ່າໃດຊົ່ວໂມງໃນການເດີນທາງໄປກໍ່ຈະເຖິງຈຸດຫມາຍ.
ພູເຂົາຄວາຍອຸທິຍານເຂດປ່າສະຫງວນແຫ່ງຊາດ ທີ່ແສນງົດງາມແຫ່ງນີ້ ກວມເອົາເນື້ອທີ່ຫລາຍກວ່າ 2.000 ກິໂລຕາແມັດ, ຢູ່ຫ່າງຈາກນະຄອນຫລວງວຽງຈັນ ໄປທາງທິດຕາເວັນອອກສຽງເຫນືອ,ໄລຍະທາງປະມານ 40 ກິໂລແມັດ ຈາກນະຄອນຫລວງວຽງຈັນ ທ່ານກໍຈະເຫັນພູຫີນສູງເດັ່ນທີ່ເກີດຂຶ້ນມາເອງຕາມທຳມະຊາດ ເປັນຫນ້າເຊີຍຊົມທີ່ປົນເປໄປດ້ວຍປ່າ ໄມ້ຕາມລະດູການທີ່ຂຽວສະອຸ່ມຊຸ່ມເຢັນຕະຫລອດປີ. ສະຖານທີ່ນີ້ ເປັນແຫ່ງອະນຸຮັກທຳມະຊາດທີ່ສວຍງາມທີ່ສຸດແຫ່ງຫນຶ່ງໃນລາວ, ມີທັງຕົ້ນດອກເຜີ້ງ ແລະ ພືດນາໆພັນຫລາຍຮ້ອຍຊະນິດ, ແຂ່ງຂັນກັນເບັ່ງບານໄປຕະຫລອດລະດູຝົນ, ແລະ ທັງເປັນບ່ອນອາໄສຂອງສັດປ່າທີ່ລ້ຽງລູກດ້ວຍນ້ຳນົມຫລາຍຊະນິດເຊັ່ນ: ຊ້າງ, ເສືອ, ຫມີ ແລະ ຊະນີ ນອກຈາກນີ້ແລ້ວພວກເຮົາຍັງຈະໄດ້ເຫັນສັດເລືອຄານຕ່າງໆເຊັ່ນ: ງູ, ແລນ ພວກສັດເຄິ່ງບົກເຄິ່ງນ້ຳ ແລະ ພວກນົກ ເຊິ່ງເຮັດໃຫ້ພູເຂົາຄວາຍກາຍເປັນບ່ອນທີ່ຖືກອົກຖືກໃຈສຳລັບຜູ້ທີ່ຮັກສາປ່າ ແລະເຫມາະສຳລັບກິດຈະກຳກາງແຈ້ງເຊັ່ນ: ການຍ່າງປ່າ, ພາຍເຮືອ, ຊົມວິຖີຊີວິດປ່າ, ກິນເຂົ້າປ່າ ແລະ ຕັ້ງແຄ້ມໄປແບບຄອບຄົວ ຫລື ແບບຫມູ່ພວກກໍ່ຈະເປັນການດີ ເພາະສະຖານທີ່ແຫ່ງນີ້ ຢູ່ບໍ່ໄກຈາກນະຄອນຫລວງທ່ານສາມາດໄປກັບໄດ້ຢ່າງບໍ່ເຮງຮ້ອນ ແຕ່ຖ້າວ່າ ທ່ານຈະພັກຄ້າງຄືນໃນບ້ານລາວແບບເກົ່າແກ່, ການຕ້ອນຮັບດ້ວຍມິດໄມຕີ ກໍ່ເປັນໄປໄດ້ ເພື່ອເປັນການສະສົມປະສົບການໃຫ້ຊີວິດໃນບ້ານຊົນນະບົດເພາະການໄປຍ່າງປ່າໃນເຂດປ່າສະຫງວນມັນຈະນຳ ທ່ານໄປສູ່ການທ່ອງທ່ຽວແບບອະນຸຮັກທຳມະຊາດຕາມແຜນຂອງລັດຖະບານລາວເຮົາໄປພ້ອມ.