ຣີສອດເມືອງຫລາ
ຣີສອດເມືອງຫລາ ເປັນຊື່ເອີ້ນຂອງເມືອງຕັ້ງຢູ່ບ້ານນ້ອຍ ແຫ່ງຫນຶ່ງທາງທິດຕາເວັນອອກສຽງເຫນືອຂອງເມືອງຫລາ ແຂວງອຸດົມໄຊ ທີ່ຢູ່ລຽບຕາມລຳແມ່ນ້ຳຂອງທີ່ໂອບອ້ອມໄປດ້ວຍ ພູຜາປ່າໄມ້ ແລະ ທົ່ງນາສີຂຽວ ສະອູ່ມ ເປັນສະຖານທີ່ມີຊື່ສຽງແຫ່ງຫນຶ່ງ ທັງເປັນບ່ອນພັກຜ່ອນທີ່ສະຫງົບແບບພິເສດ ເຫມາະສົມສຳລັບນັກທ່ອງທ່ຽວຕ່າງຊາດ ແລະ ຜູ້ທີ່ມັກຢູ່ແບບມິດໆທັງຫມົດມີປະມານ 10 ເຮັກຕາ ເຊິ່ງສະຖານທີ່ແຫ່ງນີ້ ແຕກຕ່າງຈາກບ່ອນອື່ນຍ້ອນມີຕົ້ນດອກໄມ້ຫລາຍໆຊະນິດປູກອ້ອມທົ່ວຣີສອດ.
ຣີສອດດັ່ງກ່າວນີ້ ຖືກສ້າງຂຶ້ນແຕ່ປີ 2006 ດ້ວຍນັກອອກແບບອັນປານີດຂອງຄົນລາວ ໂດຍກົງເຊິ່ງນຳໃຊ້ເຕັກນິກທີ່ທັນສະໄຫມປະສານສົມທົບກັບແບບເຮືອນດັ້ງເດີມຂອງຊາວ ບ້ານມາປະຍຸກໃຊ້ໃຫ້ເຂົ້າກັບສະພາບທຳມະຊາດ ແລະ ດິນຟ້າອາກາດຂອງເຂດເມືອງເຫນືອ, ຮູບເຮືອນທາງນອກຈະເປັນລັກສະນະແບບເຮືອນບູຮານ ເຮັດດ້ວຍໄມ້ລາຄາແພງ ເຮັດເປັນຕູບ ນ້ອຍໆມີ 2 ຫ້ອງນອນທັງຫມົດ ມີ 45 ຫລັງນ້ອຍ ແລະ 3 ຫລັງໃຫຍ່ ເປັນຫລັງຫ່າງໆກັນລຽນກັນລ້າຍຊ້າຍຕາມແຄມຂອງເຫມາະສົມສຳລັບຊົມວິວໄດ້ທຸກຍາມ, ມີສີສັນລອດລາຍ ເປັນຂອງຊົນເຜົ່າ ເຊິ່ງແຕ່ລະຫ້ອງຈະມີສິລະປະລາຍລາວທີ່ຖືກຮ້ອງຊື່ຕາມກຸ່ມຂອງຊົນເຜົ່ານັ້ນໆເຊັ່ນ: ມົ້ງ, ອາຄາ, ຂະມຸ ສ່ວນທາງດ້ານໃນເປັນລັກສະນະແບບຫ້ອງໂອໂຖງຕົບແຕ່ງ, ປະດັບປະດາດ້ວຍດອກໄມ້, ດອກໄຟ ແລະ ເຄື່ອງເຟີນີເຈີຄົບຊຸດທີ່ທັນສະໄຫມໄດ້ອອກແບບມາຢ່າງລະອຽດອ່ອນ ແລະ ສົມບູນແບບສຸດໆເລີຍ ດ້ວຍຊ່າງສີມືອາຊີບຂອງຄົນທ້ອງຖິ່ນນັ້ນໆ. ສ່ວນທາງອີກດ້ານຫນຶ່ງຂອງຣີສອດກໍ່ເປັນສະຫນາມກ໊ອຟ, ເດີ່ນບານ, ບານບ້ວງ, ເປຕັງ ແລະ ສູນລວມການອອກກຳລັງກາຍ, ສ່ວນການບໍລິການກໍ່ເປັນກັນເອງ, ນອກ ຈາກນັ້ນ ເຂົາເຈົ້າຍັງມີເຮືອນຳທ່ຽວໄວ້ຄອຍບໍລິການທ່ານທີ່ຢາກລ່ອງເຮືອຕາມລຳນ້ຳອູ ຫລື ຈະເປັນຄາລະວານນຳທ່ຽວຂຶ້ນພູເດີນປ່າ ຫລື ອາດຈະມັກເປັນແບບໃດໃນສະຖານທີ່ແຫ່ງນີ້ ແມ່ນຕອບສະຫນອງໄດ້ຕາມຄວາມຕ້ອງການສຳລັບການທ່ອງທ່ຽວ ແລະ ພັກຜ່ອນ.
ໃນຍາມແລງແສງແດດອ່ອນໆ ຄວາມງາມຂອງດອກໄມ້ທີ່ເບັ່ງບານຫລາຍສີ ໄດ້ກາຍເປັນຈຸດຫນ້າສົນໃຈ ແລະ ເປັນອາຫານຂອງພວກແມງກະເບື້ອ, ແມງເຜີ້ງ ແລະ ອື່ນໆບິນຕອມ ດອກໄມ້ຢູ່ບໍ່ຂາດສາຍໃນບໍລິເວນອ້ອມຮອບນັ້ນ, ຣີສອດເມືອງ ຫລາເປັນສະຖານທີ່ທ່ອງທ່ຽວ ແບບອະນຸຮັກທຳມະຊາດຂອງ ເຂດເມືອງຫລາ ແຂວງອຸດົມໄຊ ເປັນອີກບ່ອນຫນຶ່ງທີ່ຫນ້າປະທັບໃຈດ້ວຍຮອຍຍິ້ມທີ່ສົດໃສ, ການບໍລິການທີ່ເປັນກັນເອງດ້ວຍຄວາມອົບອຸ່ນ ແລະ ສະຫງົບຂອງຣີສອດແຫ່ງນີ້ທີ່ຕ້ອນຮັບແຂກທີ່ເຂົ້າມາຢາມ.