ບຸນຫໍ່ເຂົ້າສະຫລາກ
ບຸນຫໍ່ເຂົ້າສະຫລາກ ໝາຍເຖິງບຸນທີ່ພະສົງ ສາມະເນນໄດ້ຈັບສະຫລາກ ເພື່ອເອົາປັດໄຈຖວາຍທານ ແລະ ເຄື່ອງຢູ່ຂອງກິນ ທີ່ອອກຕົນຍາດໂຍມ ນຳເອົາມາຖວາຍ ແລະ ບຸນນີ້ຈະເຮັດຂຶ້ນ ໃນມື້ເພັງເດືອນສິບ ຈຶ່ງເອີ້ນອີກຢ່າງໜຶ່ງວ່າ: ບຸນເດືອນສິບ ເຊິ່ງປີນີ້ກົງກັບວັນສຸກ ທີ 16 ກັນຍາ 2016 ນີ້. ພະອາຈານຄຳເພົາ ວົງແສງສີ ຢູ່ວັດຊຽງຍືນ ນະຄອນຫລວງວຽງຈັນ ໃຫ້ຮູ້ວ່າ: ການເຮັດບຸນ ຫໍ່ເຂົ້າສະຫລາກ ແມ່ນການປະຕິບັດ ຮີດຄອງປະເພນີ ອັນດີງາມຂອງຄົນລາວ ຊາວພຸດທີ່ໄດ້ປະຕິບັດ ກັນມາແຕ່ລຸ້ນປູ່ຍ່າຕາຍາຍ ແລະ ຕາມການບອກເລົ່າຕໍ່ກັນມາວ່າການເຮັດບຸນນີ້ ແມ່ນການສົ່ງຄືນ ດວງວິນຍານທີ່ໄຮ້ ຍາດຂາດມິດສັດນະຮົກ (ເຜດ) ທັງຫລາຍກັບຄືນສູ່ນະຮົກ ແລະ ຍັງເປັນການອຸທິດ ບຸນກຸສົນໃຫ້ຍາດຕິພີ່ນ້ອງ, ເຈົ້າກຳນາຍເວນ ແລະ ສັດເດຍລະສານຕ່າງໆ ໃຫ້ໄດ້ຮັບບຸນກຸສົນ ທີ່ຍາດຕິພີ່ນ້ອງເຮັດໃຫ້ໃນຄັ້ງນີ້.
ສຳລັບການປະຕິບັດ ຮີດຄອງປະເພນີຕ່າງໆ ລວມທັງບຸນຫໍ່ເຂົ້າສະຫລາກ ນີ້ຖືວ່າຖືກຕາມຮີດຄອງ ປະເພນີພໍສົມຄວນ, ແຕ່ກໍຍັງມີຫລາຍຢ່າງ ທີ່ຍັງຂາດຕົກບົກພ່ອງ ໂດຍສະເພາະແມ່ນ ການນຸ່ງຖືບາງຄົນຍັງບໍ່ທັນ ເປັນລະບຽບຮຽບຮ້ອຍ, ຍັງມີການນຸ່ງເຄື່ອງທີ່ສັ້ນ, ເປີດເຮືອນຮ່າງເຂົ້າວັດກໍ່ມີ ເຊິ່ງບໍ່ເໝາະສົມ ແລະ ບໍ່ຖືກກັບກາລະເວລາ, ສະຖານທີ່ ແລະ ຮີດຄອງປະເພນີທີ່ເຄີຍເຮັດມາ.
ພະຄຳອາຈານເພົາ ຍັງໃຫ້ຮູ້ຕື່ມວ່າ: ການເຮັດບຸນ ຫໍ່ເຂົ້າສະຫລາກນີ້ ແມ່ນການຮັກສາຮີດຄອງ ປະເພນີອັນດີງາມ ຂອງຄົນລາວຊາວພຸດແລ້ວ ຍັງສອນໃຫ້ຮູ້ເຖິງຄວາມກະຕັນຍູ່ ກະຕະເວທີ ຕໍ່ຍາດຕິພີ່ນ້ອງ, ພໍ່ແມ່ຜູ້ທີ່ລ່ວງລັບໄປແລ້ວ, ນອກຈາກນີ້ແລ້ວຍັງເປັນການສ້າງຄຸນງາມ ຄວາມດີດ້ວຍການເຂົ້າວັດ ຟັງທຳຕາມຄຳສັ່ງສອນ ຂອງພະພຸດທະສາສະໜາ.