ກະຕູບຮັງນົກ
ນອກຈາກຈະຕື່ນເຕັ້ນໃນການຂີ່ຊີບລາຍຜ່ານຍອດຕົ້ນໄມ້ ໃຫຍ່, ປ່າດົງ ແລະ ນ້ຳຕົກກັບທຳມະຊາດໃນເຂດສາຍພູດົງຫົວ ສາວກັນຢ່າງມ່ວນຊື່ນແລ້ວ ເຮັດໃຫ້ພວກເຮົາຊັກຊ້າຈົນລືມເວລາກັບ ຫລັງຈາກທີ່ໄດ້ຜ່ານການຜະຈົນໄພຢ່າງເຕັມທີ່ ສຸດທ້າຍກໍ່ແມ່ນການເດີນທາງຍ່າງກັບຄືນທາງເກົ່າ ເນື່ອງຈາກວ່າ ຕອນກັບກໍ່ຄ່ຳພໍດີ ຈິ່ງໄດ້ພັກແຮມຄືນທີ່ໂຮງແຮມໃນປ່າ ນັ້ນກໍ່ຄືກະຕູບຮັງນົກທຳມະຊາດນັ້ນເອງ.
ກະຕູບຮັງນັກທຳມະຊາດທີ່ວ່ານີ້ ເປັນເຮືອນພັກທີ່ຢູ່ເທິງຕົ້ນໄມ້ໃຫຍ່ ມຸງດ້ວຍຫຍ້າ, ແອ້ມດ້ວຍໄມ້ໄຜ່ບ້ານ ຫລື ບາງຫລັງ ກໍ່ແອ້ມດ້ວຍໄມ້ເຮ້ຍມີການຕົກແຕ່ງປະດັບປະດາພາຍໃນຢ່າງຄັກແນ່, ນຳໃຊ້ອຸປະກອນເຄື່ອງໃຊ້ທີ່ທັນສະໄຫມເຫມືອນກັບ ເຮືອນພັກທົ່ວໄປຕ່າງແຕ່ມັນຢູ່ໃນປ່າເທົ່ານັ້ນ ເວົ້າລວມແລ້ວ ແມ່ນເຮັດດ້ວຍໄມ້ທັງຫມົດນັບແຕ່ຂັ້ນໄດທາງຂຶ້ນ ໃນນີ້ ມີຢູ່ປະມານ 6 ຫລັງ ເຊິ່ງຕັ້ງຢູ່ຕາມຮ່ອມ ພູນັບວ່າເປັນບ້ານແບບນະວະນິຍາຍ ແສນຈະໂລແມນຕິກ ມີແສງສະຫວ່າງຂອງແມງຫິງຫ້ອຍອອກມາປະດັບເອ້ປ່າແຫ່ງນີ້ ບວກກັບແສງໄຟຟ້າທີ່ຜະລິດດ້ວຍຈັກກາສ່ວນໃນຕອນກາງຄືນ, ສ່ວນອາຫານຄ່ຳທີ່ຮ້ານອາຫານປະຈຳທີ່ນີ້ໄດ້ໃຫ້ບໍລິການແບບເປັນກັນເອງ ບໍ່ວ່າຈະເປັນອາຫານພື້ນບ້້ານແບບລາວໆ ແລະ ອາຫານສາກົນນຳອີກ. ຕູບບາງຫລັງປິ່ນຫນ້າໃສ່ນ້ຳຕົກຕາດທີ່ມະຫັດສະຈັນ ຫລື ປິ່ນເຂົ້າ ປ່າກໍ່ມີ, ທິວທັດທຳມະຊາດຈາກບ່ອນພັກຫາທົ່ງພຽງແຄມຂອງໄກປະມານ 25 ກິໂລແມັດ ໃນຍາມນອນໄດ້ຮັບກິ່ນຫອມຈາກ ຕົ້ນໄມ້ບໍລິສຸດ ຫລື ດອກໄມ້ໃນ ປ່າທີ່ສົ່ງອາຍຂອງມັນມາພ້ອມໆ ກັບສາຍລົມເຢັນໆພັດຜ່ານ ເຮັດ ໃຫ້ຮູ້ສຶກຜ່ອຍຄາຍໄປໃນຕົວ ເຮັດໃຫ້ເຮົານອນຫລັບສະບາຍ. ສຳລັບຫ້ອງນ້ຳແລ້ວເຖິງຈະບໍ່ແມ່ນຫ້ອງນ້ຳສ່ວນຕົວກໍ່ຕາມ ແຕ່ສາມາດນຳໃຊ້ໄດ້ທັງນ້ຳຮ້ອນ ແລະ ນ້ຳເຢັນທີ່ຕັ້ງຢູ່ໃກ້ຮ້ານອາຫານ ດ້ວຍຈັກໄຟຟ້າຂະຫນາດນ້ອຍທີ່ຕັ້ງເຊື່ອງໄວ້ຢູ່ໃກ້ບ່ອນນ້ຳຕົກໄດ້ສົ່ງກະແສໄຟຟ້າ ແລະ ແສງສະຫວ່າງ ເພື່ອອຳນວຍຄວາມສະດວກຕ່າງໆໃຫ້ແກ່ຕູບ ແລະ ເຂດຄ້າຍພັກແຮມ.
ໃນຕອນເຊົ້າຈະໄດ້ຍິນສຽງນ້ຳຕົກດັງຮື່ນໆເປັນບາດບວກກັບຫມອກທີ່ປົກຄຸມໄປທຸກພື້ນທີ່ແນມຈົນຊິບໍ່ເຫັນກັນ ແລະ ມັນກໍ່ຈາງອອກເມື່ອແດດອອກ ເປັນພຽງມຸມຫນຶ່ງທີ່ໄດ້ພົບຄວາມ ງຽບສະຫງັດທີ່ຫນ້າຊົງຈຳໃນຍາມເຊົ້າທີ່ພວກເຮົາໄດ້ພັກຜ່ອນ ແລະທ່ຽວອ້ອມສະຖານທີ່ ເພື່ອຊົມສິ່ງທີ່ມີຊີວິດຕົວນ້ອຍໆຕາມພຸ່ມໄມ້ ແຕ່ສະຖານທີ່ນີ້ຍັງມີສີສັນໄປດ້ວຍແມງກະເບື້ອ ແລະ ຍັງມີດອກໄມ້ ແລະ ກິ່ນອາຍຂອງປ່າໄມ້ອີກດ້ວຍ ສຸດທ້າຍກໍ່ແມ່ນການໂຕນລົງສະລອຍນ້ຳທຳມະຊາດ ເຮັດໃຫ້ພວກເຮົາຮູ້ສຶກສະບາຍຈາກຫ້ວຍນ້ຳໃນປ່າຄວາມດີໃຈພ້ອມກັບສົ່ງສຽງຫົວຢອກໄຍຢ່າງມ່ວນຊື່ນປະສານກັບສຽງນ້ຳຕົກຕາດທີ່ຢູ່ບໍລິເວນນັ້ນ ທີ່ຍາກທີ່ຈະພັນລະນາ.