ພູທາດ
ອຸດົມໄຊ ເປັນແຂວງຫນຶ່ງຕັ້ງຢູ່ທາງພາກເຫນືອຂອງລາວ ມີຊາຍແດນຕິດຈອດກັບຫລາຍແຂວງ ແລະ ປະເທດເພື່ອນບ້ານນຳອີກ ເປັນຫນຶ່ງໃນແຂວງທີ່ອຸດົມສົມບູນໄປດ້ວຍຊັບພະ ຍາກອນທຳມະຊາດ, ມີຮ່ອງຮອຍປະຫວັດສາດປູຊະນີຍະສະຖານດ້ານວັດທະນະທຳຫລາຍແຫ່ງ, ສິ່ງສຳຄັນ ຖ້າຫາກທ່ານໄດ້ໄປທີ່ອຸດົມໄຊ ກໍ່ຢ່າລືມແວ່ຊົມທີ່ພະທາດໄຊມຸງຄຸນໃນເຂດເມືອງໄຊ ພ້ອມທັງເບິ່ງທິວທັດທີ່ສາມາດແນມເຫັນໄດ້ເທດສະບານແຂວງຢ່າງຈະແຈ້ງ ແລະ ເຕັມອີ່ມ ໂດຍສະເພາະໃນຍາມເຂົ້າພັນສາຄືຈັ່ງຊີ້.
ອີງຕາມເອກະສານປະຫວັດຫຍໍ້ ຂອງພະທາດດັ່ງກ່າວໄດ້ລະບຸໄວ້ວ່າ: ຫລາຍຮ້ອຍປີຄືນຫລັງທີ່ສ້າງມາແຕ່ພະເຈົ້າໄຊຍະເສດຖາແຫ່ງນີ້ໄດ້ຮັບຜົນກະທົບຍ້ອນສົງຄາມທຳລາຍ ສະນັ້ນ ຈິ່ງມີແຕ່ຫຍ້າ, ປ່າໄມ້ໂອບອ້ອມເອົາ ໂດຍທຳມະຊາດດ້ວຍແຮງທີ່ສັດ ທາຂອງພະພຸດສະນິກະຊົນກໍ່ຄືປວງຊົນຊາວແຂວງອຸດົມໄຊ ແລະອົງການພຸດທະສາສະຫນາ ພ້ອມກັນປັບປຸງແລະ ສ້າງທາດຄືນໃຫມ່ໃນປີ 1996 ແລະ ສໍາເລັດໃນປີ 1997, ສູງປະມານ 18 ແມັດ, ທຸກໆປີໄດ້ຈັດງານສະຫລອງກັນຈົນຄົບ 3 ມື້ 3 ຄືນ ໃນທຸກໆເດືອນ 3 ເພັງຂອງທຸກປີ.
ລັກສະນະຂອງພະທາດເປັນຮູບສີ່ລ່ຽມມີຂັ້ນໃດຂຶ້ນ 4 ດ້ານຖ້ານລຸ່ມສຸດປະດັບດ້ວຍກີບບົວໃຫຍ່ ສ່ວນຖ້ານທີ 2 ເປັນຮູບ 4 ຫລ່ຽມ ທັງ 4 ແຈມີທາດນ້ອຍສູງ 2 ແມັດເຊັ່ນກັນ, ສ່ວນຖ້ານທີ 3 ແລະ ທີ 4 ເປັນຮູບແອວ ຂັນ, ຖ້ານທີ 5 ເປັນຮູບໂອຂວ້ຳ, ຖ້ານທີ 6 ເປັນຮູບແອວຂັນປະ ດັບດ້ວຍກີບບົວໃຫຍ່ 3 ດ້ານ ຈຳນວນ 16 ກາບ, ສ່ວນຖ້ານທີ 7 ເປັນຮູບແອວຂັນດວງປີ ສ່ວນເທິງເປັນຍອດລວດລາຍສິລະປະທ້ອງຖິ່ນເປັນຊົງຍອດລວດລາຍສິລະປະຂອງຊົນເຜົ່າລື້, ເວົ້າລວມແລ້ວຄວາມສູງແມ່ນບໍ່ຫລຸດລື່ນກັນກັບຄວາມກວ້າງຂອງຕີນພະທາດ.
ໃນຍາມບຸນສຳຄັນຂອງຊາດ ແລະ ບຸນປະຈຳປີ ທາງສາສະຫນາມີຜູ້ຄົນສ່ວນຫລວງຫລາຍມັກມາທ່ຽວເລາະເບິ່ງໃນສະຖານທີ່ເຂດພະທາດໄຊມຸງຄຸນ, ສ່ວນສົນກັນໄປມາຈົນຊິບໍ່ມີຮອດບ່ອນຈອດລົດອາດເວົ້າໄດ້ ວ່າເປັນຈຸດນັດພົບຂອງຄົນສ່ວນຫລາຍໃນຍາມເຂົ້າພັນສາ ໂດຍສະເພາະໃນທຸກໆວັນສິນ ເປັນຈຸດເດັ່ນຂອງວັດແຫ່ງນີ້ເລີຍເພາະຈະມີຜູ້ຄົນທີ່ມາຈາກທຸກ ສາລະທິດມັກມາໃສ່ບາດທີ່ວັດແລ້ວຊົມທິວທັດກິນອາກາດສົດໆໃນຍາມເຊົ້າ, ນັບວ່າເປັນຈຸດດຶງດູດຄວາມສົນໃຈຂອງນັກທ່ອງທ່ຽວທັງພາຍໃນ ແລະ ຕ່າງຊາດທີ່ເຂົ້າມາສັກກາລະບູຊາພະທາດດັ່ງກ່າວ ນອກນັ້ນກໍ່ ຈະໄດ້ສຳຜັດບັນຍາກາດໃນເຂດພູສູງ ກໍລະນີຂຶ້ນໄປເທິງຫໍທີ່ຕັ້ງຂອງພະທາດທີ່ສາມາດແນມເຫັນພາບທຳມະຊາດອັນສວຍງາມໃນເຂດເທດສະບານແຂວງ ໄດ້ຢ່າງຊັດເຈນ, ໃນລະດູຫນາວຈະແຕກຕ່າງຈາກຍາມແລ້ງ ຖ້າຈະແນມໄປອີກຟາກພູເບື້ອງຕາເວັນອອກກໍ່ຈະເຫັນພູຫົວຂາວນ້ອຍ-ໃຫຍ່ລຽນກັນເປັນແຖວສະຫລັບຊັບຊ້ອນໃນເຂດຊາຍ ແດນລາວ-ຫວຽດນາມ ທີ່ປົກຄຸມດ້ວຍຫມອກໃນຍາມເຊົ້າ ແລະ ຄ່ອຍໆຈາງອອກເມືອງແສງອາທິດເລີ່ມເປັ່ງປະກາຍສີຂອງມັນອອກມາ ເນື່ອງຈາກພະທາດໄຊມຸງຄຸນລັດຕະນະມິ່ງ ເມືອງຕັ້ງຢູ່ຈຸດສູງ ຈິ່ງບໍ່ເປັນເລື່ອງແປກທີ່ຜູ້ຢູ່ບໍລິເວນອ້ອມຂ້າງສາມາດແນມເຫັນພະທາດໄດ້ຕັ້ງຫລາຍກິໂລແມັດຢ່າງງົດງາມ.
ນັກທ່ອງທ່ຽວພາຍໃນ ແລະ ຕ່າງປະເທດໄດ້ໄປເມືອງອຸດົມໄຊ ຈຳນວນຫນຶ່ງມັກຂຶ້ນໄປສັກກາລະບູຊາ ຫລື ທ່ຽວຊົມຄວາມງາມຂອງພະທາດ, ສະເພາະຊາຍຫນຸ່ມ-ຍິງຫນຸ່ມ ອາດຈະຖືວ່າເປັນການພັກຜ່ອນກໍ່ວ່າໄດ້ທີ່ແນ່ນອນຄົງເປັນເພາະວ່າພະທາດແຫ່ງນີ້ຕັ້ງຢູ່ເຂດຕົວເມືອງສະດວກຕໍ່ການໄປ-ມາ ສາມາດຂີ່ລົດຂຶ້ນຈອດບໍລິເວນອ້ອມຮອບ ຫລື ຍ່າງຂຶ້ນຕາມຂັ້ນໄດທີ່ຖືກສ້າງໄວ້ປະມານ 100 ກວ່າຂັ້ນ, ຕິຕາງເປັນການອອກກຳລັງກາຍແລ້ວຈິ່ງພັກຜ່ອນໃຕ້ຮົ່ມໄມ້ແນມເບິ່ງທັດສະນີຍາພາບຂອງຕົວເມືອງໄຊ ແຂວງອຸດົມໄຊ ທີ່ຕັ້ງຢູ່ອ້ອມຮອບໃນຂະນະດຽວກັນກໍ່ມີລົມພັດຄ່ອຍໆພັດຜ່ານ ເປັນໄລຍະເຢັນສະບາຍຜ່ອນຄາຍຄວາມອິດເມື່ອຍຈະເປັນຕອນໃດກໍ່ໄດ້ ຖ້າຫາກທ່ານໄດ້ເຫັນດ້ວຍຕົນເອງຄວາມຈິງຈະເກີດຂຶ້ນກັບວ່າທ່ານຈະກຸ້ມຄ່າ ກັບເວລາທີ່ໄດ້ມາໃນສະຖານທີ່ແຫ່ງນີ້.